Bağçasarayda "Orta Cami" mimarcılıq yadikârlığınıñ açılış tedbiri ötkerildi

Все новости
17 ağustos 2013 yıl 18:05

  2013 senesi avgust 16 kunü Bağçasarayda şeerniñ mimarcılıq incisi - "Orta Caminiñ" - tantanalı açılış tedbiri ötkerildi.



  Malüm ki, Haci Enver ağa Umerov ve onıñ qorantası mimarcılıq yadikârlığını ğayrıdan tamir etmek teşebbüs kösterdiler. İşbu teşebbüs Qırımnıñ medeniy ve tarihiy mirasını ğayrıdan tiklev milliy leyhası çerçivesinde omürge keçirildi.

  Resmiy açılış tedbirinde Qırımtatar Milliy Meclis Yolbaşçısı Mustafa Cemilev, Qırım musulmanlarınıñ Müftisi Haci Emirali Ablayev, Meclis Reisiniñ birinci muavini, Bütündünya qırımtatarlar kongressiniñ Prezidenti Refat Çubarov, Umerovlar qorantasınıñ başı Enver ağa ve büyük oğlu, Kiyevdeki qırımtatarlar cemiyetiniñ reisi Aslan Omer Qırımlı, Bağçasaray ş. Yolbaşçısı Konstantin Rubanenko, Kiyevden kelgen musafir — Kiyev iqtisadiyat mektebiniñ Prezidenti Pavlo Şeremeta, qırımtatar milliy areket veteranları, qırımtatar cemaat teşkilâtlarınıñ vekilleri, Bağçasaray yerli sakinleri, em de Turkiye, Romaniya ve Ukrainanıñ bir sıra şeerlerinden kelgen musafirler iştirak ettiler.

  Aslan Omer Qırımlı çıqışta bulunır eken, şunı qayd etti ki, Allahnıñ sıñırsız rahmeti ile, Cenab-ı Haqnıñ rizası içün Cami tamir ettirildi. Onıñ aytqanına kore, bu işte Umerovlar qorantasınıñ esas maqsadı - Qırımnıñ tamır halqı — qırımtatarlarnıñ — maneviy mirasını ğayrıdan tiklemektir. Umerovlar qorantasınıñ başı Haci Enver Ağa ise şeer hızmetleriniñ temsilcilerine, şu cümleden Bağçasaray ş. yolbaşçısı Konstantin Rubanenkoğa, "Orta Camini" tamir etkende peyda olğan teşkiliy meselelerni tez-tez al etmege yardım etkenleri içün minnetdarlıq bildirdi.

  Tedbirniñ soñunda tamir etilgen Camide birinci Cuma namazı qılındı.



  Malümat içün: "Orta Cuma Camisi" - Bağçasaraynıñ baş diniy inşaatlarından biri, tahminen XVI as. soñu — XVII as. başında qurulğan. Bugünki mimariy korünüşi 1861 s. tamirine aittir. 1929 s. müminler içün qapatılğan edi.

  2012-2013 ss. Haci Enver Ağa ve oğulları Haci Aslan ile Haci Rustem Umerovlarnıñ maddiy qol tutuvı ile tamir etildi. Hatırlatamız, Umerovlar qorantası Bağçasaraydaki Han-Çairde ("6-ncı mikrorayon") yerleşken cami tamirinde maddiy qol tutuv köstergen edi, Bağçasaray cami binasını Qırım Musulmanları Diniy İdaresine qaytaruvnı maliye etip, uquqiy ceetten teşkil etti, em de Aluşta camisiniñ tamir ve qurucılıq işlerinde maddiy qol tutuv köstergen edi.

 

"Kıyev qırımlılar cemiyeti" CT matbuat hızmeti

Foto