Türkiye Cumhuriyetiniñ Ukrainadaki Büyükelçisi Yönet Can Tezel Milliy Suverenitet ve Bala Bayramı ile hayırladı

Все новости
24 nisan 2015 yıl 00:08

Öz hayırlav sözlerinde Türkiye Büyükelçisi Yönet Can Tezel bu sene Türkiye Büyük Millet Meclisi ilk toplaşuvı keçirilmesiniñ 95 yıllığı qayd etilgenini hatırlattı.

«23 Nisan 1920 - ilk Büyük Millet Meclisimiziñ, künümüzde Qurtuluş Cenk Müzeyi olaraq qullanılğan binada, bütün imkânsızlıqlarğa rağmen, birlik ve birdemlik ruhu içinde toplanğan künüdür. Zafernen yekünlengen milliy qurtuluş küreşinde ve suverentetimiznen bağlı bütün qararlar bu Mecliste alınğandır. Bundan sebep bu kün - Milli Suverenitet Bayramımızdır», - dey Büyükelçi öz muracaatında.

«Bu bayram, ilk evelâ suverentetimizniñ halqqa berilgenini bayram etmek maqsadını taşıy. Bu maqsatqa cenk devamında yetim ve öksüz qalğan yoqsul ballarnıñ da bir bahar şenligi çevresinde sevindirmek maqsadı da qoşulğandır», - dep, buyurdı Tezel efendi.

Yönet Can Tezel, hususan, Ukrainadan bir grup ballar musafir olaraq Türkiyege barğanlarına ve bazı ukrain mekteplerinde de bu bayram qayd etilgenine sevingenini ifade etti. Bunen beraber Tezel efendi 23 Nisan bayramına bağışlanğan bütün merasimlerniñ teşkil etilmesinen meşğullengen insanlarğa teşekkürlerini bildirdi. 

 

 

Bayramnıñ tarihı

23 Nisan 1920 senesi devletniñ parlamenti – Türkiye Büyük Millet Meclisi (TBMM) teşkil etildi. 1921 senesi, qabul etilgen qanunğa binayen, 23 Nisan – Türkiyeniñ ilk devlet bayramı oldı.

1 Noyabr 1922 senesi, sultanat nizamı qaldırılıp, Türkiye Cumhuriyeti ilân etilgen edi. Bu munasebet ile 1 Noyabr Milliy Suverenitet Bayramı olaraq tasdiqlandı.

Soñra Milliy Suverenitet Bayramı baharge – TBMM ilk toplaşuvı keçirilgen – 23 Nisan kününe avuştırıldı. 1935 senesi «Bayramlar aqqında» qanun qabul etildi. Oña binaen, 23 Nisan ve 1 Noyabr bayramları bir künge birleştirildi. Böyleliknen, 23 Nisan Milliy Suverenitet Bayramı olaraq qabul etildi.

Daa soñ, 1927 senesi, 23 Nisan Bala Bayramı olaraq ilân etildi ve ilk bayram Mustafa Kemal desteginen keçirildi. Atatürkniñ fikirince, her angi memleketniñ kelecegi genç nesilnen, ve devlet oña neqadar diqqat ayırğanınen bağlı.

Qanun seviyesinde 23 Nisan bayramı 1980 yılları arbiy avdarma vaqıtında Milliy Telükesizlik Şurası tarafından tastiq etildi, ve o zamandan berli Milliy Suverenitet ve Bala Bayramı olaraq qayd etile.

1979 senesi UNESCO tarafından «Halqara balalar yılı» olaraq ilân etilgen edi. O yılı başlap, bügünge qadar TRT Devlet Teleradiokampaniyası halqara bala bayramı çerçevesinde er sene 23 Nisan «Halqara bala festivalini» teşkil ete ve bu merasimge çeşit qıtamemleketlerden bala eyetlerini Türkiyege davet ete. 

 

«Qırımtatarlar Cemiyeti» CT matbuat hızmeti

Foto