Qırımtatar halqı Meclisiniñ yolbaşçısı Mustafa Cemilev Ümre yaptı

Все новости
06 ağustos 2013 yıl 16:28

  "Simferopol" ava limanında Meclis reisi Mustafa Cemilevni Qırım musulmanlarınıñ Müftisi haci Emirali Ablayev qarşıladı ve er bir musulman içün farz oldığı muqaddes yerlerge yapqan ziyareti ile hayırlap, sayğı sözlerini bildirdi.


  Meclis yolbaşçısı Mustafı Cemilevni onıñ muavini Ahtem Çiygoz, Qırım musulmanları Muftisiniñ muavini Ayder İsmailov, "Qırım" hayriye fondunıñ mudiri Riza Şevkiyev, haci Enver Ümerov ve Meclis tışqı alâqalar bolügi yolbaşçısınıñ muavini Abduraman Egiz qarşıladılar.



  2013 senesi iyülniñ 31-den avgustnıñ 4-ne qadar, Ramazan ayınıñ soñki on kunü içersinde, Milliy Meclis yolbaşçısı Mustafa Cemilev ve Kiyevdeki qırımtatarlar cemiyetiniñ reisi Aslan Ömer Qırımlı Allahqa ibadet etilgen birinci yer olğan Mekkege barıp, küçük acılıq - Ümre ibadetini - qıldılar.



  Meclis reisi Mustafa Cemilevni ve Kiyevdeki qırımtatarlar cemiyetiniñ yolbaşçısı Aslan Ömer Qırımlını ziyaretke Saudiy Arabistan Qırallığınıñ Ukrainadaki Elçisiniñ vekili Cüdiyu Ben Zabin Alhzal davet etti.

  İyül 31 kunü Meclis reisi M. Cemilev Ümreni qılğan soñ Kâbe yerleşken Mekke baş camisiniñ imamı, Saudiy Arabistan "Davet" islâm birleşmesi idaresiniñ prezidenti doktor Suleyman Al-Sallomi ve onıñ yanında bulunğan aliy dindar şahsılarnen korüşti. Bir buçuq saat devam etken subet vaqtında taraflar Qırım musulmanlarınıñ vaziyeti, Qırım ve Saudiy Arabistan arasındaki bağlarnıñ inkişafı meselelerini muzakere ettiler.

 


  Müftiy As-Sallomi qayd etti ki, Saudiy Arabistan dinsiz sovet totalitar rejimine qarşı oldı ve onıñ müstemlekesi altında eziyetlengen halqlarnıñ tarafını tuttı, bazıda eki devlet arasındaki munasebetler açıq cenk kenarına yaqınlaşqanını hatırlatqan edi.

  Musulman ümmetine dava ve fesat ketirgen çeşit sektalar meselesinde doktor As-Sallomi şunı bildirdi ki, çoqusı allarda bunıñ sebebi insanlar islâm ahlâqınıñ qaidelerini bilmegenlerinde ola, eger de din boyunca bilgiler kenişçe tarqatılsa, bu problemler eksilir. O, Qırım gençlerine Saudiy Arabistannıñ diniy universitetlerinde aliy tasil almağa yardım etecegini işandırdı. Müftiy As-Sallomi qırımtatar halqınıñ tarihı, Vatan oğrunda küreşinen bağlı, şu cümleden Meclis reisiniñ kitaplarını almağa istegenini bildirdi.

 



  Subetniñ soñunda Müftiy As-Salomi Meclis reisine altınnen süslengen Qurannıñ Damaşq basmasını ve Saudiy Arabistanda populâr olğan misler komplektini ediye etti.

  Korüşüvde Kiyevdeki qırımtatarlar cemiyetiniñ yolbaşçısıı, VI Qurultay delegatı Aslan Ömer Qırımlı da iştirak etti.

  Bundan da ğayrı, 2013 senesi avgust 1 kunü Saudiy Arabistanda ziyaret çerçivesinde Mustafa Cemilevniñ Mekkede Dünya Musulmanları birleşmesiniñ ofisinde Birleşme kâtip yardımcısı doktor Abdul Rahman A.Az-Zaid ile korüşüvi oldı. Tedbirde Aslan Ömer Qırımlı da bar edi.

 



  Doktor Az-Zaid Dünya musulmanlar birleşmesi çeşit islâm memleketleri ve cemiyetlerge köstergen yardım aqqında ayttı. O, Meclis reisiniñ ziyareti Ramazan bayramı munasebetinen tatillerge doğru kelgeni ve şu sebepten birleşme yolbaşçıları raatlıqta olğanlarını teessüf ile qayd etti. Şu sebepten o, Qırım musulmanlarınıñ problemlerini muzakere etmek içün, Meclis reisine tatil bitkenge qadar qalmaqnı ya da bayramdan soñ bir daa kelmekni teklif etti.



  Bunıñnen bir sırada o, Meclis reisine qırımtatarlarnıñ esas problemlerini yazma şekilde tarif etip, mektüpni Birleşme adına yollamaqnı tevsiye etti ve tekrar körüşilecek olsa, Birleşme qırımtatarlarğa angi yönelişlerde yardım kösterecegini belgilesin.



  Avgustnıñ 2-de Medinede Meclis reisi Mustafa Cemilev ve Aslan Ömer Qırımlınıñ şerefine meşur din hızmetçisi, dört mezhepniñ eñ keniş tarqalğan, qırımtatarlar da mensüp olğan hanefiy mezhebiniñ esasçısı Ebu Hanifeniñ (699-767 ss.) torunçesiniñ torunçesi Muhammed Al-Hanefiy malikanesinde iftar berildi.



  Avgustnıñ 3-de Muhammed Peyğamberniñ (s.a.v.) doğrudan-doğru varisi olğan Abdulaziz Abduaal tarafından Meclis reisi Mustafa Cemilev ve Kiyevdeki qırımtatarlar cemitetiniñ yolbaşçısı Aslan Ömer Qırımlınıñ şerefine iftar berildi. İftarda Cidda şeeri yolbaşçısınıñ yardımcısı, Saudiy Arabistan Qırallığı arbiy elitasınıñ vekilleri, jurnalistler iştirak ettiler.

  Şunı da qayd etmeli ki, 1996 senesi Meclis reisi Mustafa Cemilev ilk sefer ukrain eyyetiniñ erkânında Ümrege barğan edi, aradan 16 yıl keçken soñra musulmanlarnıñ ibadetini bir daa yerine ketirdi.

 

"Kıyev qırımlılar cemiyeti" CT matbuat hızmeti

Foto